M仔:
我同女朋友拍咗四年拖，但係佢一直都只會對我講我係佢朋友。工作上我幫到佢好多，亦有喺金錢同生活上照顧佢...但係同時佢又會覺得我管得佢太多，不斷話我好煩。直到上個月佢話我哋其實好大機會結婚，所以想喺結婚之前”睇吓個世界”，叫我等佢幾個月，玩完之後一定會返嚟。你覺得我應唔應該堅持等佢？我可以點做？#呀鹽信箱
鹽：

亲，如果可以嘅話，我希望而家喺你隔離，然後大巴大巴刮醒你😂😂😂
其實你有無諗過，有時候令你堅持嘅可能並唔係愛，而係唔甘心？當你得唔到一個人嘅愛，就會好自然比更多力，希望得到對方認同。但係有無諗過，其實用力過度，除咗令自己不斷受傷害，亦會令到對方覺得困擾。其實好明顯呢一個係過度執着嘅狀況，對方唔再愛你，唔代表否定你呢一個人，有可能呢一刻大家真係唔適合。
我相信當女朋友同你講話想”睇下個世界”嘅時候，無謂欺騙自己，呢一句字面意思擺明就係解分手兩個字。既然對方已經唔再愛你，係呢個時候與其不斷游說對方，甚至繼續供養，不如退開一步暫停一下，俾多啲空間大家思考，尤其是係你自己。你會發現，當保持一段距離之後，其實自己都可以好平靜同客觀咁分析究竟你係咪真係咁鍾意呢一個人，唔好同我講嗰啲話”我驚以後都搵唔到一個好似佢咁嘅人”.....你要信我，只要你能夠放低唔甘心，心再次平靜如水，更好嘅人一定會好快出現。
同時，學識放手係關鍵。愛一個人係承諾，promise大家互相倚靠互相尊重互相成長，大家眼中就只有對方一個人。邊有人可以咁自私，心裏面想搵另外一個，但係現實又想拖住另外一個咁唔公平？我明白，可能你自己心底一早清楚佢已經唔再愛你，但係畢竟大家都付出咗四年嘅時間，即使眼前嘅人想離開，你好想繼續捍衞呢段感情。但係既然你可以用咁大嘅努力，時間同金錢，去說服自己繼續跳入火坑，明明好痛仍然要同自己講”I am fine”，點解唔可以用同樣嘅勇氣去說服自己離開？分手好痛，過程亦好攰，但係起碼呢種痛付出先至有意義。其實我相信你心裏面有答案，只係你唔願意面對。我希望能夠給你勇氣，就當大病一場，退燒之後就重新出發，the best is yet to come。
至於供養方面，無論錢係來自你或者你嘅屋企人都好，辛苦賺返嚟嘅錢應該自己留著。間中用金錢去氹下另一半我覺得係可以嘅，但係長期供養，好容易令另一半萌生貪念，將愛情同私欲傻傻分不清。都係果句，其實你都明我講咩嘅，俾多啲信心自己，一個真正愛你嘅人，應該係可以同你共患難亦可共富貴，你係一定會遇到嘅！當然，如果你真係好鍾意做善事嘅話，我唔介意你供養我嘅funding，例如Bonnie’s bag fund (講笑)，再唔係捐去星火仲有意義🧡
記住：放手，永不會太遲。
你要愛自己多點。
共勉之
#女人像鹽
Search